عصفورة العمر
شروقيه من ديواني حفنة غزل
==================
فالبحر كل ما الشمس بتصير مستوره
ببعث عيوني لصوب الدار كسدوره
بلكي ان شافوكي بصدري يهتدي الخفاق
ويعطوا شعوري امل تا كمِّل الصوره
قديش ناطر الو قوس القزح مشتاق
يرمي خيوطو على زنار تنوره
تا بكل بصه عليكي يسبح الخلاق
وتغر منو النجوم تفل مقهوره
والقلب مثل الوتر فيو نغم حراق
من لحن حُبك عزفلي اليوم مازوره
وقلي اندهلا تجي تا شوف جوي راق
غيرا ما برضا عَغصن العمر عصفوره
وصرخت مثل الطفل مشتاق مش سراق
طلي بكفي بسجن العاج مأسوره
ويما لصوبي بتجي تقولي ما ظل فراق
يما عيوني اقبلي بهالسجن ناطوره
-----------------------------------
بقلمي راضي مشيلح
ليست هناك تعليقات:
إرسال تعليق